lahu lahu sa dil-e-dagh-dar le ke chale

lahū lahū sā dil-e-dāġh-dār le ke chale

chaman se tohfa-e-fasl-e-bahār le ke chale

ruke to sāya-e-abr-e-bahār ban ke ruke

chale to gardish-e-lail-o-nahār le ke chale

sunā hai husn kī mahfil meñ pyaar biktā hai

kaho ki ishq bhī dāman ke taar le ke chale

kaho sabā se ki baiThe haiñ riñd jām-ba-kaf

chaman meñ qāfila-e-nau-bahār le ke chale

vafā kī raah meñ sab kuchh luTā diyā ham ne

hamīñ ko ahl-e-vafā sū-e-dār le ke chale

kahīñ to dil ko milegā sukūn-e-ahl-e-junūñ

chalo jahāñ bhī dil-e-be-qarār le ke chale

unheñ to Duub hī jaanā hai ek din 'vāqif'

jo sochte haiñ hameñ koī paar le ke chale

lahu lahu sa dil-e-dagh-dar le ke chale

chaman se tohfa-e-fasl-e-bahaar le ke chale

ruke to saya-e-abr-e-bahaar ban ke ruke

chale to gardish-e-lail-o-nahaar le ke chale

suna hai husn ki mahfil mein pyar bikta hai

kaho ki ishq bhi daman ke tar le ke chale

kaho saba se ki baiThe hain rind jam-ba-kaf

chaman mein qafila-e-nau-bahaar le ke chale

wafa ki rah mein sab kuchh luTa diya hum ne

hamin ko ahl-e-wafa su-e-dar le ke chale

kahin to dil ko milega sukun-e-ahl-e-junun

chalo jahan bhi dil-e-be-qarar le ke chale

unhen to Dub hi jaana hai ek din 'waqif'

jo sochte hain hamein koi par le ke chale