لہو میں ڈوبا ہوا چاند بے لحاف بھی ہو

لہو میں ڈوبا ہوا چاند بے لحاف بھی ہو

بدن میں رینگتے سائے کا انکشاف بھی ہو

یہ بند آنکھوں میں سپنے کہاں سے آتے ہیں

ردائے نیند میں شاید کوئی شگاف بھی ہو

کبھی کبھار کوئی رت ہو بھیگنے والی

کبھی کبھار یہ چہرے کی گرد صاف بھی ہو

ملا ہے زخم تو اس زخم کے بھرم کے لیے

مرے لبوں پہ تبسم کا اک غلاف بھی ہو

میں اپنے آپ میں بیدار رہنا چاہتا ہوں

کبھی کبھی کوئی سازش مرے خلاف بھی ہو

مرے رفیق تکلف کے دائرے سے نکل

کہ اتفاق میں تھوڑا سا اختلاف بھی ہو

یہ کیا کہ میری ہر اک بات مستند ہو جائے

مزہ تو جب ہے کہ لوگوں کو انحراف بھی ہو