lahu mein Dubi hui phir koi sada aai

lahū meñ Duubī huī phir koī sadā aa.ī

ilāhī ḳhair ki maqtal se phir ghaTā aa.ī

bichhaḌ ga.ī thī koī ruuh apne saa.e se

kisī ko DhūñDne vaalī koī sadā aa.ī

laraz uThā dar-o-dīvār kā bhī sannāTā

kisī taraf se achānak jo ye havā aa.ī

kisī ke aks ke saa.e meñ jal rahā thā maiñ

ki shāḳh-e-dil se ulajhne ko phir sabā aa.ī

jhulas ke saare parinde hue haiñ ḳhākistar

havā meñ pankh pasāre hue balā aa.ī

bikharte jism ko kaise sañbhāltā koī

sukūt-e-shahr meñ jab zor se havā aa.ī

thakan se chuur huuñ apne hī saa.e meñ so luuñ

jagāne mujh ko abhī kyoñ mirī qazā aa.ī

lahu mein Dubi hui phir koi sada aai

ilahi KHair ki maqtal se phir ghaTa aai

bichhaD gai thi koi ruh apne sae se

kisi ko DhunDne wali koi sada aai

laraz uTha dar-o-diwar ka bhi sannaTa

kisi taraf se achanak jo ye hawa aai

kisi ke aks ke sae mein jal raha tha main

ki shaKH-e-dil se ulajhne ko phir saba aai

jhulas ke sare parinde hue hain KHakistar

hawa mein pankh pasare hue bala aai

bikharte jism ko kaise sanbhaalta koi

sukut-e-shahr mein jab zor se hawa aai

thakan se chur hun apne hi sae mein so lun

jagane mujh ko abhi kyon meri qaza aai