lahu mein KHak-e-shifa gundhne ki KHwahish thi

lahū meñ ḳhāk-e-shifā gūñdhne kī ḳhvāhish thī

mujhe husain se kuchh māñgne kī ḳhvāhish thī

vo jis pisar ke jigar meñ utar ga.ī barchhī

usī pisar ko javāñ dekhne kī ḳhvāhish thī

mirī talāsh mujhe karbalā meñ le aa.ī

mujhe zamīñ pe ḳhudā DhūñDne kī ḳhvāhish thī

jinhoñ ne luuTā thā maulā husain kā lāsha

unhīñ sināñ se ridā lūTne kī ḳhvāhish thī

maiñ dauḌtī rahī har tiir ke ta.āqub meñ

mujhe pidar kā galā chūmne kī ḳhvāhish thī

ḳhudā ke āḳhirī lashkar meñ bas bahattar the

ḳhudā ko karb-o-balā jītne kī ḳhvāhish thī

mire husain mujhe hur samajh muāfī de

mire husain mujhe lauTne kī ḳhvāhish thī

bujhā charāġh to parkhā junūñ bahattar kā

jinheñ lahū se ziyā bāñTne kī ḳhvāhish thī

furāt mashk meñ bhar ke ḳhiyām tak ġhāzī

na lauT paayā magar lauTne kī ḳhvāhish thī

sināñ kī nok pe dekho husain zinda hai

kaTā nahīñ hai jo sar kāTne kī ḳhvāhish thī

salām ashk kī ḳhushbū meñ oḌh kar 'rāhib'

dayār-e-karb-o-balā bhejne kī ḳhvāhish thī

lahu mein KHak-e-shifa gundhne ki KHwahish thi

mujhe husain se kuchh mangne ki KHwahish thi

wo jis pisar ke jigar mein utar gai barchhi

usi pisar ko jawan dekhne ki KHwahish thi

meri talash mujhe karbala mein le aai

mujhe zamin pe KHuda DhunDne ki KHwahish thi

jinhon ne luTa tha maula husain ka lasha

unhin sinan se rida luTne ki KHwahish thi

main dauDti rahi har tir ke taaqub mein

mujhe pidar ka gala chumne ki KHwahish thi

KHuda ke aaKHiri lashkar mein bas bahattar the

KHuda ko karb-o-bala jitne ki KHwahish thi

mere husain mujhe hur samajh muafi de

mere husain mujhe lauTne ki KHwahish thi

bujha charagh to parkha junun bahattar ka

jinhen lahu se ziya banTne ki KHwahish thi

furaat mashk mein bhar ke KHiyam tak ghazi

na lauT paya magar lauTne ki KHwahish thi

sinan ki nok pe dekho husain zinda hai

kaTa nahin hai jo sar kaTne ki KHwahish thi

salam ashk ki KHushbu mein oDh kar 'rahib'

dayar-e-karb-o-bala bhejne ki KHwahish thi