لہو میں لتھڑے ہوئے پرندے تلاش کرتے ہیں آشیانہ

لہو میں لتھڑے ہوئے پرندے تلاش کرتے ہیں آشیانہ

وہ شخص چاہے تو لوٹ آئے گا خوشبوؤں کا حسیں زمانہ

غموں کی چکی میں پس کے میری تو ساری بنیاد ہل گئی ہے

اکھڑنے والا ہے رفتہ رفتہ مری تمنا کا شامیانہ

ازل سے قسمت میں ہم فقیروں کی ہجرتوں کے غبار آئے

ہمارے جیسوں کا تیری دنیا میں تھا نہیں دائمی ٹھکانہ

ہماری حالت پہ دشت والوں نے گریہ کرتے سجائی محفل

ہماری وحشت پہ درد ناچے تھے کرب لکھتے رہے فسانہ

میں اپنے بچپن سے سن رہا ہوں کلام باہو سخی کا جامیؔ

فقیر باہو کی سب عطا ہے مرا سخن بھی ہے عارفانہ