lahu mein rang-e-suKHan us ka bhar ke dekhte hain

lahū meñ rañg-e-suḳhan us kā bhar ke dekhte haiñ

charāġh baam se jis ko utar ke dekhte haiñ

mulā.emat hai ġhazal kī sī us kī bātoñ meñ

ye baat hai to chalo baat karke dekhte haiñ

sahīfa-e-lab-o-ruḳhsār-o-pairahan us kā

tilāvatoñ meñ haiñ patte shajar ke dekhte haiñ

balā ke naame haiñ do sīpyā.ī āñkhoñ meñ

gurez-o-gardish-o-ġhamze nazar ke dekhte haiñ

balā.eñ lete hue husn-e-be-nihāyat kī

tirī taraf tire ushshāq Dar ke dekhte haiñ

charāġhte haiñ kisī nazm ke ghane abrū

kisī ġhazal kī judā.ī meñ mar ke dekhte haiñ

Thahar gayā ho na āvāz-e-pā tirī sun kar

so dil pe ra.asha-zada haath dhar ke dekhte haiñ

karaḳhtagī hai na ḳhud-raftagī na fahmā.ish

mizāj badle hue ham safar ke dekhte haiñ

ruke hue haiñ bahut log dekhne ke liye

so ham bhī sho.abde us ḳhvāb-gar ke dekhte haiñ

bharī hai rañj kī bārish se umr kī kārez

ham ek kone meñ baiThe haiñ ghir ke dekhte haiñ

ab uTh bhī jaa.e koī ḳhvāb-gāh-e-girya se

vo pau phaTī vo manāre sahar ke dekhte haiñ

ye sīmyā.ī badan ḳhvāb-e-nīm-shab to nahīñ

so ḳhāl-o-ḳhad kī tamāzat ko Dar ke dekhte haiñ

ai tere sabza-e-ruḳhsār kī dil-āvezī

navāh-e-chashm se aañsū guzar ke dekhte haiñ

kaTī hai umr ġhazal-zād-gāñ kī sohbat meñ

unhī ke kūche meñ āḳhir bikhar ke dekhte haiñ

mashaqqatī haiñ tire kāḳh-o-kū-e-hijr ke ham

sharāb-e-hijr pyāle meñ bhar ke dekhte haiñ

jhukā.e kāñdhoñ ko ushshāq pā-ba-gil kī tarah

niDhāl pyaas se ham log thar ke dekhte haiñ

balā kā qaht hai sailāb hai ta.attul hai

koī vatan hai manāzir ġhadar ke dekhte haiñ

ho izn sañg-e-lahad ke tavāf kā 'āmir'

tuyūr uḌte hue kāshġhar ke dekhte haiñ

chalī hai tohmat-o-takzīb kī havā 'āmir'

so shahr-e-ḳhāk-o-ḳhabar meñ Thahar ke dekhte haiñ

lahu mein rang-e-suKHan us ka bhar ke dekhte hain

charagh baam se jis ko utar ke dekhte hain

mulaemat hai ghazal ki si us ki baaton mein

ye baat hai to chalo baat karke dekhte hain

sahifa-e-lab-o-ruKHsar-o-pairahan us ka

tilawaton mein hain patte shajar ke dekhte hain

bala ke name hain do sipyai aankhon mein

gurez-o-gardish-o-ghamze nazar ke dekhte hain

balaen lete hue husn-e-be-nihayat ki

teri taraf tere ushshaq Dar ke dekhte hain

charaghte hain kisi nazm ke ghane abru

kisi ghazal ki judai mein mar ke dekhte hain

Thahar gaya ho na aawaz-e-pa teri sun kar

so dil pe rasha-zada hath dhar ke dekhte hain

karaKHtagi hai na KHud-raftagi na fahmaish

mizaj badle hue hum safar ke dekhte hain

ruke hue hain bahut log dekhne ke liye

so hum bhi shoabde us KHwab-gar ke dekhte hain

bhari hai ranj ki barish se umr ki karez

hum ek kone mein baiThe hain ghir ke dekhte hain

ab uTh bhi jae koi KHwab-gah-e-girya se

wo pau phaTi wo manare sahar ke dekhte hain

ye simyai badan KHwab-e-nim-shab to nahin

so KHal-o-KHad ki tamazat ko Dar ke dekhte hain

ai tere sabza-e-ruKHsar ki dil-awezi

nawah-e-chashm se aansu guzar ke dekhte hain

kaTi hai umr ghazal-zad-gan ki sohbat mein

unhi ke kuche mein aaKHir bikhar ke dekhte hain

mashaqqati hain tere kaKH-o-ku-e-hijr ke hum

sharab-e-hijr pyale mein bhar ke dekhte hain

jhukae kandhon ko ushshaq pa-ba-gil ki tarah

niDhaal pyas se hum log thar ke dekhte hain

bala ka qaht hai sailab hai tattul hai

koi watan hai manazir ghadar ke dekhte hain

ho izn sang-e-lahad ke tawaf ka 'amir'

tuyur uDte hue kashghar ke dekhte hain

chali hai tohmat-o-takzib ki hawa 'amir'

so shahr-e-KHak-o-KHabar mein Thahar ke dekhte hain