lahu mein sadh sat ko bhar raha hun

lahū meñ saadh sat ko bhar rahā huuñ

koī hujra charāġhāñ kar rahā huuñ

jhaTak kar dil se saare lobh lālach

yahāñ ban-bās meñ behtar rahā huuñ

azāb-e-āḳhirat kī baat aage

itāb-e-zindagī se Dar rahā huuñ

mirī pahchān merā gyaan hijrat

sadā ausān meñ be-ghar rahā huuñ

koī dekhe na aa kar dāġh-e-hasrat

badan par oḌh kar chādar rahā huuñ

mulavvis thā maiñ har be-rah-ravī meñ

magar ilzām tujh par dhar rahā huuñ

taḌapte tan ko miTTī par girā kar

sar-e-sahrā burīda-sar rahā huuñ

darakte rañg bādal ḳhvāb ḳhushbū

samay kī saj se bahra-var rahā huuñ

Darā huuñ tere ḳhauf-e-be-bahā se

musalle par sar-e-mahshar rahā huuñ

tirī be-e'tinā.ī se gilā kyā

maiñ apne aap par dūbhar rahā huuñ

lahu mein sadh sat ko bhar raha hun

koi hujra charaghan kar raha hun

jhaTak kar dil se sare lobh lalach

yahan ban-bas mein behtar raha hun

azab-e-aKHirat ki baat aage

itab-e-zindagi se Dar raha hun

meri pahchan mera gyan hijrat

sada ausan mein be-ghar raha hun

koi dekhe na aa kar dagh-e-hasrat

badan par oDh kar chadar raha hun

mulawwis tha main har be-rah-rawi mein

magar ilzam tujh par dhar raha hun

taDapte tan ko miTTi par gira kar

sar-e-sahra burida-sar raha hun

darakte rang baadal KHwab KHushbu

samay ki saj se bahra-war raha hun

Dara hun tere KHauf-e-be-baha se

musalle par sar-e-mahshar raha hun

teri be-e'tinai se gila kya

main apne aap par dubhar raha hun