laila ka agar mujhko kirdar mila hota

lailā kā agar mujh ko kirdār milā hotā

majnūñ sā kahānī ko ādhār milā hotā

sahrā meñ nikal jaatā dariyā bhī sarāboñ se

gar kalpanā ko merī ākār milā hotā

pal bhar kī mohabbat meñ jaañ tak bhī maiñ de detī

afsos nahīñ hotā gar pyaar milā hotā

hotī na mahā-bhārat yā koī baġhāvat phir

haqdār ko jo us kā adhikār milā hotā

ayyāsh amīroñ ke laḌke na bigaḌte gar

aurat ko na phir koī bāzār milā hotā

bhūke na bhaTakte phir din raat parinde ye

jo in ko shajar koī phaldār milā hotā

maiñ nūr-jahāñ hotī us daur kī ai 'sīmā'

gar mujh ko jahāñgīrī darbār milā hotā

laila ka agar mujh ko kirdar mila hota

majnun sa kahani ko aadhaar mila hota

sahra mein nikal jata dariya bhi sarabon se

gar kalpana ko meri aakar mila hota

pal bhar ki mohabbat mein jaan tak bhi main de deti

afsos nahin hota gar pyar mila hota

hoti na maha-bhaarat ya koi baghawat phir

haqdar ko jo us ka adhikar mila hota

ayyash amiron ke laDke na bigaDte gar

aurat ko na phir koi bazar mila hota

bhuke na bhaTakte phir din raat parinde ye

jo in ko shajar koi phaldar mila hota

main nur-jahan hoti us daur ki ai 'sima'

gar mujh ko jahangiri darbar mila hota