lakir-e-sang ko anqa-misal humne kiya

lakīr-e-sañg ko anqā-misāl ham ne kiyā

bhulā diyā use dil se kamāl ham ne kiyā

shurū us ne kiyā thā tamāsha qurbat kā

phir us ke baad to saarā dhamāl ham ne kiyā

ulaT ke rakh diye ham ne junūñ ke saare usuul

junūb-e-dasht ko shahr-e-shimāl ham ne kiyā

faroġh-e-zaḳhm se raushan rakhā siyāhī ko

atā-e-hijr ko najm-e-visāl ham ne kiyā

basā liyā tirī ḳhushbū ko mazra-e-jāñ meñ

shaguft-e-ġham tujhe kaisā nihāl ham ne kiyā

ik aur mauj thī is mauj-e-āgahī se udhar

so auj-e-aql ko nazr-e-zavāl ham ne kiyā

bahāna koī nahīñ ab safar meñ rahne kā

zamīn-e-ḳhvāb tujhe pā.emāl ham ne kiyā

ye be-niyāzī zarūrī thī kār-e-ulfat meñ

so ḳhud kā dhyān na terā ḳhayāl ham ne kiyā

sabā to ḳhud hī muḳhātib thī ai fazā-e-qafas

gavāh rahiyo na koī savāl ham ne kiyā

dhanak sī ban ga.ī goyā.ī se samā.at tak

ye kis ke rañg ko juzv-e-maqāl ham ne kiyā

hamāre zaḳhm kī surḳhī baḌhā gayā 'arshad'

vo barg-e-sabz jise dast-māl ham ne kiyā

lakir-e-sang ko anqa-misal hum ne kiya

bhula diya use dil se kamal hum ne kiya

shuru us ne kiya tha tamasha qurbat ka

phir us ke baad to sara dhamal hum ne kiya

ulaT ke rakh diye hum ne junun ke sare usul

junub-e-dasht ko shahr-e-shimal hum ne kiya

farogh-e-zaKHm se raushan rakha siyahi ko

ata-e-hijr ko najm-e-visal hum ne kiya

basa liya teri KHushbu ko mazra-e-jaan mein

shaguft-e-gham tujhe kaisa nihaal hum ne kiya

ek aur mauj thi is mauj-e-agahi se udhar

so auj-e-aql ko nazr-e-zawal hum ne kiya

bahana koi nahin ab safar mein rahne ka

zamin-e-KHwab tujhe paemal hum ne kiya

ye be-niyazi zaruri thi kar-e-ulfat mein

so KHud ka dhyan na tera KHayal hum ne kiya

saba to KHud hi muKHatib thi ai faza-e-qafas

gawah rahiyo na koi sawal hum ne kiya

dhanak si ban gai goyai se samaat tak

ye kis ke rang ko juzw-e-maqal hum ne kiya

hamare zaKHm ki surKHi baDha gaya 'arshad'

wo barg-e-sabz jise dast-mal hum ne kiya