lakir khinchna diwar mat bana lena

lakīr khīñchnā dīvār mat banā lenā

tum iḳhtilāf ko āzār mat banā lenā

ba-nām-e-dād-e-suḳhan ye jo shor barpā hai

ise kalām kā me.aar mat banā lenā

kahānī sunte raho shauq se magar ḳhud ko

kisī kahānī kā kirdār mat banā lenā

tumhāre ashkoñ kī goyā.ī se maiñ Dartā huuñ

unheñ vasīl-e-iz.hār mat banā lenā

mohabbatoñ ke safar meñ yaqīñ to lāzim hai

kisī ke va.ade ko patvār mat banā lenā

visāl se hī nikalte haiñ hijr ke mausam

guloñ kī shāḳh ko talvār mat banā lenā

haveliyoñ meñ jo baaqī sharāfateñ haiñ abhī

ab un ko zīnat-e-bāzār mat banā lenā

ye shohratoñ kī talab Thiik hai magar 'tāriq'

tum apnī zaat ko aḳhbār mat banā lenā

lakir khinchna diwar mat bana lena

tum iKHtilaf ko aazar mat bana lena

ba-nam-e-dad-e-suKHan ye jo shor barpa hai

ise kalam ka mear mat bana lena

kahani sunte raho shauq se magar KHud ko

kisi kahani ka kirdar mat bana lena

tumhaare ashkon ki goyai se main Darta hun

unhen wasil-e-izhaar mat bana lena

mohabbaton ke safar mein yaqin to lazim hai

kisi ke wade ko patwar mat bana lena

visal se hi nikalte hain hijr ke mausam

gulon ki shaKH ko talwar mat bana lena

haweliyon mein jo baqi sharafaten hain abhi

ab un ko zinat-e-bazar mat bana lena

ye shohraton ki talab Thik hai magar 'tariq'

tum apni zat ko aKHbar mat bana lena