lamha-bhar mein apna kar le wo nazar hai muKHtalif

lamha-bhar meñ apnā kar le vo nazar hai muḳhtalif

kyā kareñ tujh se talab ham terā sar hai muḳhtalif

tum ho māhir chaak karne meñ kisī bhī chiiz ko

joḌtā huuñ maiñ mirā dast-e-hunar hai muḳhtalif

maiñ kisī manzil ko manzil aaj tak samjhā nahīñ

haiñ alag socheñ mirī merī Dagar hai muḳhtalif

ḳhvāhish-e-sīm-o-sadaf us ko kahāñ hai tū batā

maiñ na kahtā thā tujhe vo ik bashar hai muḳhtalif

is zamīñ kī daldaloñ se vāsta un ko nahīñ

āsmānoñ par parindoñ kā safar hai muḳhtalif

in dinoñ dīvār koī darmiyāñ us ke na thī

maiñ samajhtā thā zamīñ par merā ghar hai muḳhtalif

aañkh meñ aañsū haiñ us ke bal jabīñ par haiñ paḌe

lag rahā hai ab ke ḳhat meñ kuchh ḳhabar hai muḳhtalif

ġham kā sūraj chāñd ġham kā ġham kī dhartī hai yahāñ

kyā batā.ūñ merī duniyā kis qadar hai muḳhtalif

ḳhuuñ meñ lat-pat raat se shāyad milī hai ye gale

ġhaur se dekho 'nazar' rang-e-sahar hai muḳhtalif

lamha-bhar mein apna kar le wo nazar hai muKHtalif

kya karen tujh se talab hum tera sar hai muKHtalif

tum ho mahir chaak karne mein kisi bhi chiz ko

joDta hun main mera dast-e-hunar hai muKHtalif

main kisi manzil ko manzil aaj tak samjha nahin

hain alag sochen meri meri Dagar hai muKHtalif

KHwahish-e-sim-o-sadaf us ko kahan hai tu bata

main na kahta tha tujhe wo ek bashar hai muKHtalif

is zamin ki daldalon se wasta un ko nahin

aasmanon par parindon ka safar hai muKHtalif

in dinon diwar koi darmiyan us ke na thi

main samajhta tha zamin par mera ghar hai muKHtalif

aankh mein aansu hain us ke bal jabin par hain paDe

lag raha hai ab ke KHat mein kuchh KHabar hai muKHtalif

gham ka suraj chand gham ka gham ki dharti hai yahan

kya bataun meri duniya kis qadar hai muKHtalif

KHun mein lat-pat raat se shayad mili hai ye gale

ghaur se dekho 'nazar' rang-e-sahar hai muKHtalif