lamha-e-rafta ka dil mein zaKHm sa ban jaega

lamha-e-rafta kā dil meñ zaḳhm sā ban jā.egā

jo na pur hogā kabhī aisā ḳhalā ban jā.egā

ye na.e naqsh-e-qadam mere bhaTakne se bane

log jab in par chaleñge rāsta ban jā.egā

guuñj sunñī ho to tanhā vādiyoñ meñ chīḳhiye

ek hī āvāz se ik silsila ban jā.egā

jazb kar de merī miTTī meñ latāfat kā mizāj

phir vo tere shahr kī āb-o-havā ban jā.egā

khīñch lā.egī bagūloñ ko ye vīrānī mirī

merī tanhā.ī se merā qāfila ban jā.egā

us meñ lau rakh dūñgā maiñ jalte hue ehsās kī

lafz jo hoñToñ se niklegā diyā ban jā.egā

jugnuoñ kī mash.aloñ se sahn kī dīvār par

raqs kartī raushnī kā dā.era ban jā.egā

talḳhiyāñ ehsās kī jab ḳhuun meñ ghul jā.eñgī

merā chehra mere ġham kā aa.ina ban jā.egā

ik brahman ne ye aa ke sehan-e-masjid meñ kahā

ishq jis patthar ko chhū le vo ḳhudā ban jā.egā

ek sīdhī baat hai milnā na milnā ishq meñ

is pe sochoge to ye bhī mas.ala ban jā.egā

mere siine meñ abhī ik jazba-e-benām hai

zabt karte karte harf-e-mudda.ā ban jā.egā

dil meñ jo kuchh hai vo kah do dost se varna 'salīm'

harf-e-nā-gufta diloñ kā fāsla ban jā.egā

lamha-e-rafta ka dil mein zaKHm sa ban jaega

jo na pur hoga kabhi aisa KHala ban jaega

ye nae naqsh-e-qadam mere bhaTakne se bane

log jab in par chalenge rasta ban jaega

gunj sunni ho to tanha wadiyon mein chiKHiye

ek hi aawaz se ek silsila ban jaega

jazb kar de meri miTTi mein latafat ka mizaj

phir wo tere shahr ki aab-o-hawa ban jaega

khinch laegi bagulon ko ye virani meri

meri tanhai se mera qafila ban jaega

us mein lau rakh dunga main jalte hue ehsas ki

lafz jo honTon se niklega diya ban jaega

jugnuon ki mashalon se sahn ki diwar par

raqs karti raushni ka daera ban jaega

talKHiyan ehsas ki jab KHun mein ghul jaengi

mera chehra mere gham ka aaina ban jaega

ek brahman ne ye aa ke sehan-e-masjid mein kaha

ishq jis patthar ko chhu le wo KHuda ban jaega

ek sidhi baat hai milna na milna ishq mein

is pe sochoge to ye bhi masala ban jaega

mere sine mein abhi ek jazba-e-benam hai

zabt karte karte harf-e-muddaa ban jaega

dil mein jo kuchh hai wo kah do dost se warna 'salim'

harf-e-na-gufta dilon ka fasla ban jaega