lamha lamha dastak de kar taDpata hai jaane kaun

lamha lamha dastak de kar taḌpātā hai jaane kaun

raat ga.e man-darvāze par aa jaatā hai jaane kaun

apnī sāñsoñ kī ḳhushbū ko ghol ke merī sāñsoñ meñ

merā suunā jīvan-āñgan mahkātā hai jaane kaun

ik anjāne haath ko aksar shāne par mahsūs karūñ

mujh se duur hī rah kar mujh ko apnātā hai jaane kaun

āñkheñ to parbat ke pīchhe chhupte chāñd ko dekheñ bas

us manzar kī oT meñ lekin sharmātā hai jaane kaun

dhuup meñ dasht-e-tanhā.ī kī mere jalte hoñToñ ko

lams apne gul-barg lab kā de jaatā hai jaane kaun

apne parā.e chhūT ga.e sab ās-khilaune TuuT ga.e

phir bhī ziddī man-bālak ko bahlātā hai jaane kaun

yaksāñ tevar yaksāñ chehre sab hī dukh dene vaale

lekin is bastī meñ bhī ik sukh-dātā hai jaane kaun

lamha lamha dastak de kar taDpata hai jaane kaun

raat gae man-darwaze par aa jata hai jaane kaun

apni sanson ki KHushbu ko ghol ke meri sanson mein

mera suna jiwan-angan mahkata hai jaane kaun

ek anjaane hath ko aksar shane par mahsus karun

mujh se dur hi rah kar mujh ko apnata hai jaane kaun

aankhen to parbat ke pichhe chhupte chand ko dekhen bas

us manzar ki oT mein lekin sharmata hai jaane kaun

dhup mein dasht-e-tanhai ki mere jalte honTon ko

lams apne gul-barg lab ka de jata hai jaane kaun

apne parae chhuT gae sab aas-khilaune TuT gae

phir bhi ziddi man-baalak ko bahlata hai jaane kaun

yaksan tewar yaksan chehre sab hi dukh dene wale

lekin is basti mein bhi ek sukh-data hai jaane kaun