لمحہ لمحہ پگھل رہا ہوں میں

لمحہ لمحہ پگھل رہا ہوں میں

شمع کی طرح جل رہا ہوں میں

اپنا چہرہ بدل نہیں پایا

آئنہ پھر بدل رہا ہوں میں

آپ کا کیوں اداس ہے چہرہ

گر پڑا تھا سنبھل رہا ہوں میں

مجھ سے روشن ہیں راستے سارے

آندھیوں تم کو کھل رہا ہوں میں

آ رہی ہے صدائے زندہ باد

صرف کروٹ بدل رہا ہوں میں

جس کو صدیاں بھلا نہ پائیں گی

ایک ایسا بھی پل رہا ہوں میں

اپنے اجداد کی وراثت کو

اپنے پیروں کچل رہا ہوں میں

یہ محبت خلوص ہمدردی

سب کے معنی بدل رہا ہوں میں

ہر طرف نور سا برستا ہے

میکدے سے نکل رہا ہوں میں

مستؔ روشن ہے شاہراہ حیات

جاں نثار غزل رہا ہوں میں