lamha lamha pighal raha hun main

lamha lamha pighal rahā huuñ maiñ

sham' kī tarh jal rahā huuñ maiñ

apnā chehra badal nahīñ paayā

aa.ina phir badal rahā huuñ maiñ

aap kā kyoñ udaas hai chehra

gir paḌā thā sañbhal rahā huuñ maiñ

mujh se raushan haiñ rāste saare

āñdhiyoñ tum ko khal rahā huuñ maiñ

aa rahī hai sadā-e-zindābād

sirf karvaT badal rahā huuñ maiñ

jis ko sadiyāñ bhulā na pā.eñgī

ek aisā bhī pal rahā huuñ maiñ

apne ajdād kī virāsat ko

apne pairoñ kuchal rahā huuñ maiñ

ye mohabbat ḳhulūs hamdardī

sab ke mā'nī badal rahā huuñ maiñ

har taraf nuur sā barastā hai

mai-kade se nikal rahā huuñ maiñ

'mast' raushan hai shāhrāh-e-hayat

jāñ-nisār-e-ġhazal rahā huuñ maiñ

lamha lamha pighal raha hun main

sham' ki tarh jal raha hun main

apna chehra badal nahin paya

aaina phir badal raha hun main

aap ka kyon udas hai chehra

gir paDa tha sanbhal raha hun main

mujh se raushan hain raste sare

aandhiyon tum ko khal raha hun main

aa rahi hai sada-e-zindabaad

sirf karwaT badal raha hun main

jis ko sadiyan bhula na paengi

ek aisa bhi pal raha hun main

apne ajdad ki wirasat ko

apne pairon kuchal raha hun main

ye mohabbat KHulus hamdardi

sab ke ma'ni badal raha hun main

har taraf nur sa barasta hai

mai-kade se nikal raha hun main

'mast' raushan hai shahrah-e-hayat

jaan-nisar-e-ghazal raha hun main