lamha lamha wusat-e-kaun-o-makan ki sair ki

lamha lamha vus.at-e-kaun-o-makāñ kī sair kī

aa gayā so ḳhuub maiñ ne ḳhāk-dāñ kī sair kī

ek lamhe ke liye tanhā nahīñ hone diyā

ḳhud ko apne saath rakkhā jis jahāñ kī sair kī

tujh se mil kar aaj andāza huā hai zindagī

pahle jitnī kī vo goyā rā.egāñ kī sair kī

niiñd se jaage haiñ koī ḳhvāb bhī dekhā hai kyā

dekhā hai to boliye shab-bhar kahāñ kī sair kī

thak gayā thā maiñ badan meñ rahte rahte ek din

bhaag niklā aur jā kar āsmāñ kī sair kī

yaad hai ik ek gosha naqsh hai dil par hanūz

sair to vo hai jo shahr-e-dil-barāñ kī sair kī

phuul hairat se hameñ dekhā kiye vaqt-e-visāl

gul-badan ke saath 'āzar' gulsitāñ kī sair kī

lamha lamha wusat-e-kaun-o-makan ki sair ki

aa gaya so KHub main ne KHak-dan ki sair ki

ek lamhe ke liye tanha nahin hone diya

KHud ko apne sath rakkha jis jahan ki sair ki

tujh se mil kar aaj andaza hua hai zindagi

pahle jitni ki wo goya raegan ki sair ki

nind se jage hain koi KHwab bhi dekha hai kya

dekha hai to boliye shab-bhar kahan ki sair ki

thak gaya tha main badan mein rahte rahte ek din

bhag nikla aur ja kar aasman ki sair ki

yaad hai ek ek gosha naqsh hai dil par hanuz

sair to wo hai jo shahr-e-dil-baran ki sair ki

phul hairat se hamein dekha kiye waqt-e-visal

gul-badan ke sath 'azar' gulsitan ki sair ki