lamha-lamha ye jo zanjir hua jata hun

lamha-lamha ye jo zanjīr huā jaatā huuñ

apne hī aap meñ tasḳhīr huā jaatā huuñ

koī kis tarah churā.egā ḳhad-o-ḳhāl mire

maiñ to dīvār pe tahrīr huā jaatā huuñ

jism par shauq-e-safar oḌh liyā hai maiñ ne

aur rah-e-ishq kā rahgīr huā jaatā huuñ

band ho dar bhī to de detā hai rauzan rastā

raushnī meñ tirī tanvīr huā jaatā huuñ

ye alag baat ki tū ne mujhe dekhā bhī nahīñ

kyoñ tire ḳhvāb kī ta.abīr huā jaatā huuñ

maiñ kahīñ ruk sā gayā huuñ na.e mausam kī tarah

apnī aamad meñ hī tāḳhīr huā jaatā huuñ

merā ahvāl batā detā hai ausāf us ke

āj-kal us kī maiñ tafsīr huā jaatā huuñ

barf sī oḌh lī 'shahzād' badan par apne

aur isī dhyān meñ tasvīr huā jaatā huuñ

lamha-lamha ye jo zanjir hua jata hun

apne hi aap mein tasKHir hua jata hun

koi kis tarah churaega KHad-o-KHal mere

main to diwar pe tahrir hua jata hun

jism par shauq-e-safar oDh liya hai main ne

aur rah-e-ishq ka rahgir hua jata hun

band ho dar bhi to de deta hai rauzan rasta

raushni mein teri tanwir hua jata hun

ye alag baat ki tu ne mujhe dekha bhi nahin

kyon tere KHwab ki tabir hua jata hun

main kahin ruk sa gaya hun nae mausam ki tarah

apni aamad mein hi taKHir hua jata hun

mera ahwal bata deta hai ausaf us ke

aaj-kal us ki main tafsir hua jata hun

barf si oDh li 'shahzad' badan par apne

aur isi dhyan mein taswir hua jata hun