لمحہ لمحہ یہ جو زنجیر ہوا جاتا ہوں

لمحہ لمحہ یہ جو زنجیر ہوا جاتا ہوں

اپنے ہی آپ میں تسخیر ہوا جاتا ہوں

کوئی کس طرح چرائے گا خد و خال مرے

میں تو دیوار پہ تحریر ہوا جاتا ہوں

جسم پر شوق سفر اوڑھ لیا ہے میں نے

اور رہ عشق کا رہ گیر ہوا جاتا ہوں

بند ہو در بھی تو دے دیتا ہے روزن رستا

روشنی میں تری تنویر ہوا جاتا ہوں

یہ الگ بات کہ تو نے مجھے دیکھا بھی نہیں

کیوں ترے خواب کی تعبیر ہوا جاتا ہوں

میں کہیں رک سا گیا ہوں نئے موسم کی طرح

اپنی آمد میں ہی تاخیر ہوا جاتا ہوں

میرا احوال بتا دیتا ہے اوصاف اس کے

آج کل اس کی میں تفسیر ہوا جاتا ہوں

برف سی اوڑھ لی شہزادؔ بدن پر اپنے

اور اسی دھیان میں تصویر ہوا جاتا ہوں