lamhe shab-e-visal ke sarf-e-visal ho gae

lamhe shab-e-visāl ke sarf-e-visāl ho ga.e

us ko bhī niiñd aa ga.ī ham bhī niDhāl ho ga.e

kaise hasīn log the kaisī hasīn mahfileñ

vo jo ḳhayāl-o-ḳhvāb the ḳhvāb-o-ḳhayāl ho ga.e

maiñ bhī thā rashk-e-ā.īna tum bhī the rashk-e-ā.īna

maiñ bhī sifāl ho gayā tum bhī sifāl ho ga.e

mujh ko thī un kī zaat se aisī musābqat ki bas

jab maiñ banā misāl to vo be-misāl ho ga.e

chashm vo nāz-āfrīñ khul ke baras paḌeñ kahīñ

ham se ka.ī nihāl-e-ġham phir se nihāl ho ga.e

bāloñ meñ barf thī yahāñ ḳhvāhish bhī sard thī yahāñ

us ne jo aañch dī to ham sho.ala-ḳhisāl ho ga.e

gutthī hai utnī gunjlak asrār-e-kā.enāt kī

jitne mire javāb the saare savāl ho ga.e

kāyā-kalap huī hai yuuñ gurgān-e-dasht-e-sūs kī

girya-kunāñ jamāl-jū zohra-jamāl ho ga.e

lamhe shab-e-visal ke sarf-e-visal ho gae

us ko bhi nind aa gai hum bhi niDhaal ho gae

kaise hasin log the kaisi hasin mahfilen

wo jo KHayal-o-KHwab the KHwab-o-KHayal ho gae

main bhi tha rashk-e-aina tum bhi the rashk-e-aina

main bhi sifal ho gaya tum bhi sifal ho gae

mujh ko thi un ki zat se aisi musabqat ki bas

jab main bana misal to wo be-misal ho gae

chashm wo naz-afrin khul ke baras paDen kahin

hum se kai nihaal-e-gham phir se nihaal ho gae

baalon mein barf thi yahan KHwahish bhi sard thi yahan

us ne jo aanch di to hum shoala-KHisal ho gae

gutthi hai utni gunjlak asrar-e-kaenat ki

jitne mere jawab the sare sawal ho gae

kaya-kalap hui hai yun gurgan-e-dasht-e-sus ki

girya-kunan jamal-ju zohra-jamal ho gae