laraz laraz ke dil-e-na-tawan Thahar hi na jae

laraz laraz ke dil-e-nā-tavāñ Thahar hī na jaa.e

firāq-e-sāz kahīñ rūh-e-naġhma mar hī na jaa.e

utaar le kisī shīshe meñ sā.at-e-naġhma

sadā-e-qāfila-e-gul kahīñ bikhar hī na jaa.e

sunā bhī de kisī gul ko fusūn-e-tanhā.ī

rah-e-ḳhayāl se ye kārvāñ guzar hī na jaa.e

hai ek qulzum-e-ḳhūñ qarya-e-junūñ se udhar

yahāñ jo aa.e koī us kī phir ḳhabar hī na jaa.e

kisī ko mohlat-e-hastī bhī de ġham-e-jānāñ

ye kyā ki aa.e koī to palaT ke ghar hī na jaa.e

vo ḳhush-mizāj hai us ko alam se kyā nisbat

sunā na ishq kā ġham, ishq se vo Dar hī na jaa.e

nigāh-e-yār, ġham-e-jāñ-gusil kā kyā hogā

tire karam se nasīb-e-vafā sañvar hī na jaa.e

bahā de aaj kuchh aañsū ki phir ġhanīmat haiñ

chaḌhā hai aaj jo dariyā vo kal utar hī na jaa.e

bajā ki jaañ se guzarnā bahut kaThin hai magar

tire nisār koī aisā kaam kar hī na jaa.e

laraz laraz ke dil-e-na-tawan Thahar hi na jae

firaq-e-saz kahin ruh-e-naghma mar hi na jae

utar le kisi shishe mein saat-e-naghma

sada-e-qafila-e-gul kahin bikhar hi na jae

suna bhi de kisi gul ko fusun-e-tanhai

rah-e-KHayal se ye karwan guzar hi na jae

hai ek qulzum-e-KHun qarya-e-junun se udhar

yahan jo aae koi us ki phir KHabar hi na jae

kisi ko mohlat-e-hasti bhi de gham-e-jaanan

ye kya ki aae koi to palaT ke ghar hi na jae

wo KHush-mizaj hai us ko alam se kya nisbat

suna na ishq ka gham, ishq se wo Dar hi na jae

nigah-e-yar, gham-e-jaan-gusil ka kya hoga

tere karam se nasib-e-wafa sanwar hi na jae

baha de aaj kuchh aansu ki phir ghanimat hain

chaDha hai aaj jo dariya wo kal utar hi na jae

baja ki jaan se guzarna bahut kaThin hai magar

tere nisar koi aisa kaam kar hi na jae