لرز اٹھا تھا ہونٹوں پر کوئی اقرار تقریباً

لرز اٹھا تھا ہونٹوں پر کوئی اقرار تقریباً

نگاہیں کر چکی تھیں عشق کا اظہار تقریباً

اسے ذہنی تلاطم سے گزر کر دل تک آنا تھا

اور اس نے کر لیا تھا آدھا دریا پار تقریباً

ہمارے درمیاں پھر آ گئے بھولے ہوئے ماضی

وگرنہ گر چکی تھی بیچ کی دیوار تقریباً

کبھی ہفتوں مہینوں میں ذرا کچھ بات ہو تو ہو

وگرنہ کھو چکی ہے لذت گفتار تقریباً

ابھی پچھلے دنوں تک مطمئن تھا دل کہ تم تو ہو

مگر اب ختم ہیں تسکین کے آثار تقریباً