larazta hai mera dil zahmat-e-mehr-e-daraKHshan par
laraztā hai mirā dil zahmat-e-mehr-e-daraḳhshāñ par
maiñ huuñ vo qatra-e-shabnam ki ho ḳhār-e-bayābāñ par
na chhoḌī hazrat-e-yūsuf ne yaañ bhī ḳhāna-ārā.ī
safedī dīda-e-yāqūb kī phirtī hai zindāñ par
fanā tālīm-e-dars-e-be-ḳhudī huuñ us zamāne se
ki majnūñ laam alif likhtā thā dīvār-e-dabistāñ par
farāġhat kis qadar rahtī mujhe tashvīsh-e-marham se
baham gar sulh karte pāra-hā-e-dil namak-dāñ par
nahīñ iqlīm-e-ulfat meñ koī tūmār-e-nāz aisā
ki pusht-e-chashm se jis kī na hove mohr unvāñ par
mujhe ab dekh kar abr-e-shafaq-ālūda yaad aayā
ki furqat meñ tirī ātish barastī thī gulistāñ par
ba-juz parvāz-e-shauq-e-nāz kyā baaqī rahā hogā
qayāmat ik havā-e-tund hai ḳhāk-e-shahīdāñ par
na laḌ nāseh se 'ġhālib' kyā huā gar us ne shiddat kī
hamārā bhī to āḳhir zor chaltā hai garebāñ par
dil-e-ḳhūnīñ-jigar be-sabr-o-faiz-e-ishq-e-mustaġhnī
ilāhī yak qayāmat ḳhāvar aa TuuTe badaḳhshāñ par
'asad' ai be-tahammul arbada be-jā hai nāseh se
ki āḳhir be-kasoñ kā zor chaltā hai garebāñ par
larazta hai mera dil zahmat-e-mehr-e-daraKHshan par
main hun wo qatra-e-shabnam ki ho KHar-e-bayaban par
na chhoDi hazrat-e-yusuf ne yan bhi KHana-arai
safedi dida-e-yaqub ki phirti hai zindan par
fana talim-e-dars-e-be-KHudi hun us zamane se
ki majnun lam alif likhta tha diwar-e-dabistan par
faraghat kis qadar rahti mujhe tashwish-e-marham se
baham gar sulh karte para-ha-e-dil namak-dan par
nahin iqlim-e-ulfat mein koi tumar-e-naz aisa
ki pusht-e-chashm se jis ki na howe mohr unwan par
mujhe ab dekh kar abr-e-shafaq-aluda yaad aaya
ki furqat mein teri aatish barasti thi gulistan par
ba-juz parwaz-e-shauq-e-naz kya baqi raha hoga
qayamat ek hawa-e-tund hai KHak-e-shahidan par
na laD naseh se 'ghaalib' kya hua gar us ne shiddat ki
hamara bhi to aaKHir zor chalta hai gareban par
dil-e-KHunin-jigar be-sabr-o-faiz-e-ishq-e-mustaghni
ilahi yak qayamat KHawar aa TuTe badaKHshan par
'asad' ai be-tahammul arbada be-ja hai naseh se
ki aaKHir be-kason ka zor chalta hai gareban par
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
