larzan main jo ruh ke pardon mein anwar luTae jati hun

larzāñ maiñ jo ruuh ke pardoñ meñ anvār luTā.e jaatī huuñ

hastī ke zarre zarre ko ḳhurshīd banā.e jaatī huuñ

kuchh nikhre nikhre giit haiñ jo hoñToñ se baraste rahte haiñ

ik mīThī mīThī aag hai jo har sū bhaḌkā.e jaatī huuñ

ḳhud apnī lai ko suntī huuñ ḳhush hotī huuñ sar dhuntī huuñ

ash.ār meñ Dhaal ke ashkoñ ko mastī meñ gaa.e jaatī huuñ

dil aksar choTeñ sahtā hai aur chup chup rotā rahtā hai

go sar-tā-pā ġham huuñ lekin hañstī huuñ hañsā.e jaatī huuñ

mauhūm sī ek tamannā kī ḳhātir ye havādis tauba hai

phūloñ kī mohabbat meñ kāñTe āñkhoñ se lagā.e jaatī huuñ

kyā jaane kis se kahtī huuñ ḳhvāboñ ke sunahre afsāne

Thahro ki abhī maiñ aatī huuñ Thahro ki bin aa.e jaatī huuñ

mālūm kabhī ye hotā hai mahsūr huuñ chāñd sitāroñ meñ

mahsūs kabhī ye kartī huuñ zarroñ meñ samā.e jaatī huuñ

'najma' phir sundar sapnoñ meñ banñe lage qasr ummīdoñ ke

phir ret ke girte sāhil par buniyād uThā.e jaatī huuñ

larzan main jo ruh ke pardon mein anwar luTae jati hun

hasti ke zarre zarre ko KHurshid banae jati hun

kuchh nikhre nikhre git hain jo honTon se baraste rahte hain

ek miThi miThi aag hai jo har su bhaDkae jati hun

KHud apni lai ko sunti hun KHush hoti hun sar dhunti hun

ashaar mein Dhaal ke ashkon ko masti mein gae jati hun

dil aksar choTen sahta hai aur chup chup rota rahta hai

go sar-ta-pa gham hun lekin hansti hun hansae jati hun

mauhum si ek tamanna ki KHatir ye hawadis tauba hai

phulon ki mohabbat mein kanTe aankhon se lagae jati hun

kya jaane kis se kahti hun KHwabon ke sunahre afsane

Thahro ki abhi main aati hun Thahro ki bin aae jati hun

malum kabhi ye hota hai mahsur hun chand sitaron mein

mahsus kabhi ye karti hun zarron mein samae jati hun

'najma' phir sundar sapnon mein banne lage qasr ummidon ke

phir ret ke girte sahil par buniyaad uThae jati hun