lashkar-e-ishq aa paDa hai mulk-e-dil par TuT TuT

lashkar-e-ishq aa paḌā hai mulk-e-dil par TuuT TuuT

kaan meñ aatī nahīñ hai juz sadā-e-lūT-lūT

mil nahīñ saktā ḳhudā hai is ḳhudī ke saath meñ

ai dil is qaid-e-ḳhudī se jald-tar ab chhūT chhūT

barq saañ hañsnā tirā yaad aave hai jis dam mujhe

abr kī mānind rotā huuñ maiñ yaksar phuuT phuuT

hai sadā-e-ḳhanda-e-gul ḳhaar us ke kaan meñ

is liye kahtā huuñ maiñ naale ko apne khoT khoT

tere kufr-e-zulf kī Dorī meñ aksar ahl-e-dīñ

qaid-e-dīñ-dārī se bhāge haiñ nikal kar chhūT chhūT

koī kāfir hī nahīñ juz nafs ḳhud is dahr meñ

pas isī kāfir ke sar ko raat din tū kuuT kuuT

aa gayā bahr-e-haqīqat kā hī gauhar haath meñ

hai milā jab se shah-e-ḳhādim se 'āsim' TuuT TuuT

lashkar-e-ishq aa paDa hai mulk-e-dil par TuT TuT

kan mein aati nahin hai juz sada-e-luT-luT

mil nahin sakta KHuda hai is KHudi ke sath mein

ai dil is qaid-e-KHudi se jald-tar ab chhuT chhuT

barq san hansna tera yaad aawe hai jis dam mujhe

abr ki manind rota hun main yaksar phuT phuT

hai sada-e-KHanda-e-gul KHar us ke kan mein

is liye kahta hun main nale ko apne khoT khoT

tere kufr-e-zulf ki Dori mein aksar ahl-e-din

qaid-e-din-dari se bhage hain nikal kar chhuT chhuT

koi kafir hi nahin juz nafs KHud is dahr mein

pas isi kafir ke sar ko raat din tu kuT kuT

aa gaya bahr-e-haqiqat ka hi gauhar hath mein

hai mila jab se shah-e-KHadim se 'asim' TuT TuT