lau de rahe hain aaj dil-e-dagh-dagh bhi

lau de rahe haiñ aaj dil-e-dāġh-dāġh bhī

raushan hue haiñ fikr-o-nazar ke charāġh bhī

un kā mizāj auj-e-surayyā pe hai agar

hai haft-āsmāñ pe hamārā dimāġh bhī

rakhte kahīñ qadam haiñ to paḌte kahīñ haiñ aur

sahbā-e-be-ḳhudī se haiñ chhilke ayāġh bhī

mausam badal gayā hai sabā ḳhush-ḳhirām hai

gul-hā-e-rang-rang se mahke haiñ baaġh bhī

ġham-hā.e-be-panāh ke bā-vasf dosto

fart-e-ḳhushī se aaj hai dil baaġh baaġh bhī

guzrā hai rāste se koī gul-badan zarūr

ḳhushbū kā ab to milne lagā hai surāġh bhī

fitrat judā judā hai tabī.at judā judā

rangat meñ yuuñ to ek hai koyal bhī zaaġh bhī

chehre ke ḳhadd-o-ḳhāl bhī vāzeh na kar sake

uljhā huā hai zor-e-qalam kā balāġh bhī

sahrā ko dekh kar huā 'siddīq' ye gumāñ

hāsil huā ab ahl-e-junūñ ko farāġh bhī

lau de rahe hain aaj dil-e-dagh-dagh bhi

raushan hue hain fikr-o-nazar ke charagh bhi

un ka mizaj auj-e-surayya pe hai agar

hai haft-asman pe hamara dimagh bhi

rakhte kahin qadam hain to paDte kahin hain aur

sahba-e-be-KHudi se hain chhilke ayagh bhi

mausam badal gaya hai saba KHush-KHiram hai

gul-ha-e-rang-rang se mahke hain bagh bhi

gham-hae-be-panah ke ba-wasf dosto

fart-e-KHushi se aaj hai dil bagh bagh bhi

guzra hai raste se koi gul-badan zarur

KHushbu ka ab to milne laga hai suragh bhi

fitrat juda juda hai tabiat juda juda

rangat mein yun to ek hai koyal bhi zagh bhi

chehre ke KHadd-o-KHal bhi wazeh na kar sake

uljha hua hai zor-e-qalam ka balagh bhi

sahra ko dekh kar hua 'siddiq' ye guman

hasil hua ab ahl-e-junun ko faragh bhi