لو دے رہے ہیں آج دل داغ داغ بھی

لو دے رہے ہیں آج دل داغ داغ بھی

روشن ہوئے ہیں فکر و نظر کے چراغ بھی

ان کا مزاج اوج ثریا پہ ہے اگر

ہے ہفت آسماں پہ ہمارا دماغ بھی

رکھتے کہیں قدم ہیں تو پڑتے کہیں ہیں اور

صہبائے بے خودی سے ہیں چھلکے ایاغ بھی

موسم بدل گیا ہے صبا خوش خرام ہے

گل ہائے رنگ رنگ سے مہکے ہیں باغ بھی

غم ہائے بے پناہ کے با وصف دوستو

فرط خوشی سے آج ہے دل باغ باغ بھی

گزرا ہے راستے سے کوئی گل بدن ضرور

خوشبو کا اب تو ملنے لگا ہے سراغ بھی

فطرت جدا جدا ہے طبیعت جدا جدا

رنگت میں یوں تو ایک ہے کوئل بھی زاغ بھی

چہرے کے خد و خال بھی واضح نہ کر سکے

الجھا ہوا ہے زور قلم کا بلاغ بھی

صحرا کو دیکھ کر ہوا صدیقؔ یہ گماں

حاصل ہوا اب اہل جنوں کو فراغ بھی