لو دے اٹھا چراغ تمنا بجھا ہوا

لو دے اٹھا چراغ تمنا بجھا ہوا

گزرا یہ آج کون ادھر دیکھتا ہوا

یہ حادثات بھی تو گزرنے ضرور تھے

اے عشق کیوں اداس ہے جو کچھ ہوا ہوا

وہ رنگ کیا ہوئے وہ بہاریں کدھر گئیں

اے ہم صفیر سارا چمن ہے لٹا ہوا

یوں آج بے قرار ہے دنیائے آرزو

جس طرح تلملائے کوئی دل دکھا ہوا

کیوں آج بزم زیست میں بے کیفیاں سی ہیں

اے حسن تیری مست نگاہی کو کیا ہوا

گرداب غم ہے اور مری کشتئ امید

پھر بحر زندگی میں ہے طوفاں اٹھا ہوا

اپنا پتا نہ جادۂ منزل کی کچھ خبر

خود مٹ گیا ہوں نقشؔ انہیں ڈھونڈھتا ہوا