lau de uTha charagh-e-tamanna bujha hua

lau de uThā charāġh-e-tamannā bujhā huā

guzrā ye aaj kaun idhar dekhtā huā

ye hādsāt bhī to guzarne zarūr the

ai ishq kyuuñ udaas hai jo kuchh huā huā

vo rañg kyā hue vo bahāreñ kidhar ga.iiñ

ai ham-safīr saarā chaman hai luTā huā

yuuñ aaj be-qarār hai duniyā-e-ārzū

jis tarah tilmilā.e koī dil dukhā huā

kyuuñ aaj bazm-e-zīst meñ be-kaifiyāñ sī haiñ

ai husn terī mast-nigāhī ko kyā huā

girdāb-e-ġham hai aur mirī kashtī-e-umīd

phir bahr-e-zindagī meñ hai tūfāñ uThā huā

apnā patā na jāda-e-manzil kī kuchh ḳhabar

ḳhud miT gayā huuñ 'naqsh' unheñ DhūñDhtā huā

lau de uTha charagh-e-tamanna bujha hua

guzra ye aaj kaun idhar dekhta hua

ye hadsat bhi to guzarne zarur the

ai ishq kyun udas hai jo kuchh hua hua

wo rang kya hue wo bahaaren kidhar gain

ai ham-safir sara chaman hai luTa hua

yun aaj be-qarar hai duniya-e-arzu

jis tarah tilmilae koi dil dukha hua

kyun aaj bazm-e-zist mein be-kaifiyan si hain

ai husn teri mast-nigahi ko kya hua

girdab-e-gham hai aur meri kashti-e-umid

phir bahr-e-zindagi mein hai tufan uTha hua

apna pata na jada-e-manzil ki kuchh KHabar

KHud miT gaya hun 'naqsh' unhen DhunDhta hua