lau dene laga hai teri yaadon ka diya phir

lau dene lagā hai tirī yādoñ kā diyā phir

bahke na kahīñ dekhnā jangal kī havā phir

tajdīd-e-mohabbat kā ḳhayāl aayā hai us ko

paa.e na kahīñ jurm-e-vafā kī vo sazā phir

shāyad ki lī añgḌā.ī kisī chāñd-badan ne

haijān sā ḳhāmosh samundar meñ uThā phir

ifrīt-e-shab-e-tār ne lab khole haiñ kyā kyā

ḳhāmoshī-e-sahrā se uThe koī sadā phir

phir ḳhvāb sajāne lage palkoñ pe divāne

bhauñroñ ko rijhāne lagī phūloñ kī adā phir

tum the ki mire paañv meñ zanjīr thī 'betāb'

be-nām ta.alluq hī sahī kyoñ na rahā phir

lau dene laga hai teri yaadon ka diya phir

bahke na kahin dekhna jangal ki hawa phir

tajdid-e-mohabbat ka KHayal aaya hai us ko

pae na kahin jurm-e-wafa ki wo saza phir

shayad ki li angDai kisi chand-badan ne

haijaan sa KHamosh samundar mein uTha phir

ifrit-e-shab-e-tar ne lab khole hain kya kya

KHamoshi-e-sahra se uThe koi sada phir

phir KHwab sajaane lage palkon pe diwane

bhaunron ko rijhane lagi phulon ki ada phir

tum the ki mere panw mein zanjir thi 'betab'

be-nam talluq hi sahi kyon na raha phir