lauT aae hain miyan KHud hi dar-e-yar se hum

lauT aa.e haiñ miyāñ ḳhud hī dar-e-yār se ham

yuuñ hī kab tak lage rahte bhalā dīvār se ham

dasht-e-vahshat meñ bhī un hī se huā sāmnā phir

zindagī bhāgte phirte the jin āzār se ham

yuuñ hī be-vaj.h lahū thūkte rahnā kyā hai

yahī anjām-e-vafā hai to rahe pyaar se ham

ab to bas ye hī tamanna hai ki sahrā ho aur

thak ke lag jaa.eñ kisī ret kī dīvār se ham

āñkheñ paḌhne kā hunar hī nahīñ aatā jis ko

kyā kareñ baat bhalā aise taraf-dār se ham

adh-khile phuul kī tasvīr banā lī ham ne

ḳhuub vāqif the miyāñ vaqt kī yalġhār se ham

safar-e-ishq meñ āñkhoñ meñ na.e ḳhvāb liye

har qadam uljhe rahe qāfila-sālār se ham

lauT aae hain miyan KHud hi dar-e-yar se hum

yun hi kab tak lage rahte bhala diwar se hum

dasht-e-wahshat mein bhi un hi se hua samna phir

zindagi bhagte phirte the jin aazar se hum

yun hi be-wajh lahu thukte rahna kya hai

yahi anjam-e-wafa hai to rahe pyar se hum

ab to bas ye hi tamanna hai ki sahra ho aur

thak ke lag jaen kisi ret ki diwar se hum

aankhen paDhne ka hunar hi nahin aata jis ko

kya karen baat bhala aise taraf-dar se hum

adh-khile phul ki taswir bana li hum ne

KHub waqif the miyan waqt ki yalghaar se hum

safar-e-ishq mein aankhon mein nae KHwab liye

har qadam uljhe rahe qafila-salar se hum