lauT kar wo aa nahin sakta kabhi socha nahin

lauT kar vo aa nahīñ saktā kabhī sochā nahīñ

is liye jaate hue maiñ ne use rokā nahīñ

hāsil-e-ehsās hai ik 'umr kī tishna-labī

abr kā TukḌā bhī koī shahr par barsā nahīñ

is taraf bhī intihā aur us taraf bhī intihā

vo bhī kam hañstā nahīñ aur maiñ bhī kam hañstā nahīñ

merā zauq-e-sher hai mamnūn-e-iḳhlās-e-nazar

koī fan-pāra mirā me'yār se girtā nahīñ

lafz kā koī sitāra soch kā jugnū koī

aaj bhī zulmat-gah-e-ehsās meñ chamkā nahīñ

tujh se mere rabt kā iz.hār lafzoñ meñ kahāñ

maiñ ne apne aap ko bhī is qadar chāhā nahīñ

raushnī le kar 'munavvar' maiñ gayā kis kis ke ghar

ġhair ho yā koī apnā ye kabhī dekhā nahīñ

lauT kar wo aa nahin sakta kabhi socha nahin

is liye jate hue main ne use roka nahin

hasil-e-ehsas hai ek 'umr ki tishna-labi

abr ka TukDa bhi koi shahr par barsa nahin

is taraf bhi intiha aur us taraf bhi intiha

wo bhi kam hansta nahin aur main bhi kam hansta nahin

mera zauq-e-sher hai mamnun-e-iKHlas-e-nazar

koi fan-para mera me'yar se girta nahin

lafz ka koi sitara soch ka jugnu koi

aaj bhi zulmat-gah-e-ehsas mein chamka nahin

tujh se mere rabt ka izhaar lafzon mein kahan

main ne apne aap ko bhi is qadar chaha nahin

raushni le kar 'munawwar' main gaya kis kis ke ghar

ghair ho ya koi apna ye kabhi dekha nahin