lazzat-andoz-e-KHalish hun sozan-e-taqdir ka

lazzat-andoz-e-ḳhalish huuñ sozan-e-taqdīr kā

sī rahā huuñ chaak apne dāman-e-tadbīr kā

muskurā kar is taraf chilman ko jumbish de ga.ī

zarra-zarra hil gayā yaañ zabt kī ta.amīr kā

le gayā har sunñe vaalā apne apne rang meñ

asl matlab rah gayā lekin mirī taqrīr kā

ḳhuun kar dil ko jhalak uTThegā siina nuur se

sub.h kā rang-e-shafaq dībācha hai tanvīr kā

ashk kā ik qatra-e-larzāñ sar-e-mizhgāñ huuñ maiñ

juuñ gul-e-sham.a-e-sahar huuñ muntazir ik tiir kā

ek lahn-e-muztarib hai merī mausīqī nahīñ

mere naġhmoñ meñ asar hai shevan-e-dil-gīr kā

zindagī ik ḳhvāb-e-bedārī hai bedārī nahīñ

maut hai pahlā asar is ḳhvāb kī ta.abīr kā

is do-harfī lafz meñ daftar ke daftar haiñ chhupe

dil hai ik tūmār-e-pinhāñ ishq kī tafsīr kā

kis se uljhegā ye dāman hī na hogā jab 'junūñ'

kyoñ na sāmāñ hī miTā duuñ ḳhār-e-dāman-gīr kā

lazzat-andoz-e-KHalish hun sozan-e-taqdir ka

si raha hun chaak apne daman-e-tadbir ka

muskura kar is taraf chilman ko jumbish de gai

zarra-zarra hil gaya yan zabt ki tamir ka

le gaya har sunne wala apne apne rang mein

asl matlab rah gaya lekin meri taqrir ka

KHun kar dil ko jhalak uTThega sina nur se

subh ka rang-e-shafaq dibacha hai tanwir ka

ashk ka ek qatra-e-larzan sar-e-mizhgan hun main

jun gul-e-shama-e-sahar hun muntazir ek tir ka

ek lahn-e-muztarib hai meri mausiqi nahin

mere naghmon mein asar hai shewan-e-dil-gir ka

zindagi ek KHwab-e-bedari hai bedari nahin

maut hai pahla asar is KHwab ki tabir ka

is do-harfi lafz mein daftar ke daftar hain chhupe

dil hai ek tumar-e-pinhan ishq ki tafsir ka

kis se uljhega ye daman hi na hoga jab 'junun'

kyon na saman hi miTa dun KHar-e-daman-gir ka