lazzat-e-dard-e-alam hi se sukun aa jae hai

lazzat-e-dard-e-alam hī se sukūñ aa jaa.e hai

dil mirā un kī navāzish se to ghabrā jaa.e hai

bazm meñ mere adū haiñ un se un kā irtibāt

aisā manzar kab mirī āñkhoñ se dekhā jaa.e hai

dil kī dil hī meñ rahī ye hasrat-e-dīdār bhī

merī nazreñ uThte hī vo mujh se sharmā jaa.e hai

jab na mahshar meñ bhī hogā un kā merā sāmnā

aaj jī-bhar kar taḌap luuñ jitnā taḌpā jaa.e hai

kyā sahar hone se pahle hī firāq-e-jān hai

dil mirā kuchh shaam hī se aaj baiThā jaa.e hai

aag furqat kī jo bhaḌkī jal ga.e qalb-o-jigar

ai 'zahīr' ātish-kade meñ kis se Thahrā jaa.e hai

lazzat-e-dard-e-alam hi se sukun aa jae hai

dil mera un ki nawazish se to ghabra jae hai

bazm mein mere adu hain un se un ka irtibaat

aisa manzar kab meri aankhon se dekha jae hai

dil ki dil hi mein rahi ye hasrat-e-didar bhi

meri nazren uThte hi wo mujh se sharma jae hai

jab na mahshar mein bhi hoga un ka mera samna

aaj ji-bhar kar taDap lun jitna taDpa jae hai

kya sahar hone se pahle hi firaq-e-jaan hai

dil mera kuchh sham hi se aaj baiTha jae hai

aag furqat ki jo bhaDki jal gae qalb-o-jigar

ai 'zahir' aatish-kade mein kis se Thahra jae hai