lazzat-e-dard-e-jigar dost baDha deta hai

lazzat-e-dard-e-jigar dost baḌhā detā hai

zaḳhm ristā hai to kuchh aur maza detā hai

mere zaḳhmoñ pe namak roz chhiḌak detā hai

jaane kis jurm kī vo mujh ko sazā detā hai

talḳh bātoñ se mire dil ko dukhātā hai roz

merā ho ke mire zaḳhmoñ ko havā detā hai

rañg beTā bhī badal letā hai girgiT kī tarah

vaqt paḌne pe hamesha vo daġhā detā hai

jab bhī be-parda tasavvur meñ chalā aatā hai

merī nazroñ meñ koī ḳhvāb sajā detā hai

aag siine meñ mohabbat kī sulag jaatī hai

vo nigāhoñ se mujhe jab bhī pilā detā hai

Duub jaatā hai sar-e-shām vo sūraj to magar

ḳhvāhisheñ raat ke siine meñ dabā detā hai

tere aane kī tamannā meñ hī rahtā hai 'mukesh'

terī rāhoñ meñ ye palkoñ ko bichhā detā hai

lazzat-e-dard-e-jigar dost baDha deta hai

zaKHm rista hai to kuchh aur maza deta hai

mere zaKHmon pe namak roz chhiDak deta hai

jaane kis jurm ki wo mujh ko saza deta hai

talKH baaton se mere dil ko dukhata hai roz

mera ho ke mere zaKHmon ko hawa deta hai

rang beTa bhi badal leta hai girgiT ki tarah

waqt paDne pe hamesha wo dagha deta hai

jab bhi be-parda tasawwur mein chala aata hai

meri nazron mein koi KHwab saja deta hai

aag sine mein mohabbat ki sulag jati hai

wo nigahon se mujhe jab bhi pila deta hai

Dub jata hai sar-e-sham wo suraj to magar

KHwahishen raat ke sine mein daba deta hai

tere aane ki tamanna mein hi rahta hai 'mukesh'

teri rahon mein ye palkon ko bichha deta hai