lazzat-e-dard ka kuchh tujhko pata hai ki nahin

lazzat-e-dard kā kuchh tujh ko patā hai ki nahīñ

nāsehā tū ne kabhī ishq kiyā hai ki nahīñ

bātoñ bātoñ meñ na bahlā.iye sach sach kahiye

aap ke paas mire dil kī davā hai ki nahīñ

vo jo rakhte haiñ use dair-o-haram tak mahdūd

aa ke dekheñ ki yahāñ par bhī ḳhudā hai ki nahīñ

karte phirte haiñ masīhā.ī jo duniyā bhar meñ

hālat-e-dil kā mirī un ko patā hai ki nahīñ

jab se dekhī hai tirī sāñvlī sūrat maiñ ne

sochtā huuñ ki koī aur ḳhudā hai ki nahīñ

apnī āñkhoñ se pilā.ī thī kabhī tū ne jo mai

nashsha us kā mirī āñkhoñ meñ phalā hai ki nahīñ

vasl kī baat jo karte haiñ batā.eñ pahle

raat kī raat koī dil meñ rahā hai ki nahīñ

DhūñDte phirte haiñ ḳhud us ko vo dīvāne se

dekho 'ālam' kā kahīñ koī patā hai ki nahīñ

lazzat-e-dard ka kuchh tujh ko pata hai ki nahin

naseha tu ne kabhi ishq kiya hai ki nahin

baaton baaton mein na bahlaiye sach sach kahiye

aap ke pas mere dil ki dawa hai ki nahin

wo jo rakhte hain use dair-o-haram tak mahdud

aa ke dekhen ki yahan par bhi KHuda hai ki nahin

karte phirte hain masihai jo duniya bhar mein

haalat-e-dil ka meri un ko pata hai ki nahin

jab se dekhi hai teri sanwli surat main ne

sochta hun ki koi aur KHuda hai ki nahin

apni aankhon se pilai thi kabhi tu ne jo mai

nashsha us ka meri aankhon mein phala hai ki nahin

wasl ki baat jo karte hain bataen pahle

raat ki raat koi dil mein raha hai ki nahin

DhunDte phirte hain KHud us ko wo diwane se

dekho 'alam' ka kahin koi pata hai ki nahin