لذت دید کا چسکا ہے تو آ دیکھ مجھے

لذت دید کا چسکا ہے تو آ دیکھ مجھے

صاحب دیدۂ بینا ہے تو آ دیکھ مجھے

میری صورت ہے تماشا گہ یاس و امید

گر تجھے شوق تماشا ہے تو آ دیکھ مجھے

سب مری بات پہ کہتے ہیں کہ مختل ہے دماغ

تجھ کو دیوانوں کا سودا ہے تو آ دیکھ مجھے

مجھ سے بھی برسر پیکار ہے قسمت میری

دیکھنا جنگ کا نقشہ ہے تو آ دیکھ مجھے

رابعہ ہے مرض غم سے برا حال مرا

گر مزاج آج کل اچھا ہے تو آ دیکھ مجھے

لوگ پوچھیں گے مری صورت و سیرت تجھ سے

منہ کسی کو جو دکھانا ہے تو آ دیکھ مجھے