lazzat-e-ehsas-e-gham se dil ko bahlate rahe

lazzat-e-ehsās-e-ġham se dil ko bahlāte rahe

kuchh adhūre ḳhvāb the rah rah ke yaad aate rahe

manzil-e-ġhurbat meñ pīchhe rah ga.e hushiyār log

ham divāne the bagūloñ meñ bhī itrāte rahe

luTne vāloñ se mizāj-e-shām-e-ġhurbat pūchhiye

un ko kyā ma.alūm jo tūfāñ se katrāte rahe

rasm-o-rāh-e-nau-bahārāñ kis qadar dilchasp hai

kuchh kalī khiltī rahī kuchh phuul murjhāte rahe

kyā ḳhabar raste meñ kis ne ruup kyā dhārā miyāñ

mehrbāñ vaqt-e-safar to rang barsāte rahe

rone vaale baiThe baiThe vaqt ko royā kiye

chalne vaale āñdhiy.oñ meñ bhī chale jaate rahe

bhāgte jaate haiñ ab shām-e-nazar se dūr-dūr

muddatoñ tak jo dhuñdalke ġham ko raas aate rahe

ham to saarī raat 'nāzish' bazm meñ the dam-ba-ḳhud

log andāz-e-taġhāful kī qasam khāte rahe

lazzat-e-ehsas-e-gham se dil ko bahlate rahe

kuchh adhure KHwab the rah rah ke yaad aate rahe

manzil-e-ghurbat mein pichhe rah gae hushiyar log

hum diwane the bagulon mein bhi itraate rahe

luTne walon se mizaj-e-sham-e-ghurbat puchhiye

un ko kya malum jo tufan se katraate rahe

rasm-o-rah-e-nau-bahaaran kis qadar dilchasp hai

kuchh kali khilti rahi kuchh phul murjhate rahe

kya KHabar raste mein kis ne rup kya dhaara miyan

mehrban waqt-e-safar to rang barsate rahe

rone wale baiThe baiThe waqt ko roya kiye

chalne wale aandhiyon mein bhi chale jate rahe

bhagte jate hain ab sham-e-nazar se dur-dur

muddaton tak jo dhundalke gham ko ras aate rahe

hum to sari raat 'nazish' bazm mein the dam-ba-KHud

log andaz-e-taghaful ki qasam khate rahe