لذت عشق نہیں خاک بسر ہونے تک

لذت عشق نہیں خاک بسر ہونے تک

نوبت آئے گی ابھی چاک جگر ہونے تک

تیلیوں میں جو سکت ہے وہ مجھے ہے معلوم

ہاں سلامت ہے قفس جنبش پر ہونے تک

چند ذرے جنہیں مسجود ملک ہونا تھا

کن منازل سے وہ گزرے ہیں بشر ہونے تک

ہم نے مانا کہ شب غم کی سحر ہوتی ہے

زیست کی شام نہ ہو جائے سحر ہونے تک

سرمۂ چشم بنے گی اسی پروانہ کی خاک

زندگی جس کی تھی تکمیل نظر ہونے تک

رنگ محفل نظر آتا نہیں کیا امنؔ تمہیں

اٹھ چلو بزم سے آہنگ دگر ہونے تک