لذت کار بھی حاصل نہیں بے گاروں میں

لذت کار بھی حاصل نہیں بے گاروں میں

وہ یہی سوچ کے شامل ہے غلط کاروں میں

بے رخی طرز تغافل وہ تلون کیا تھا

ایک اقرار جو ڈھلتا رہا انکاروں میں

پھر دبے پاؤں وہ چنتے ہیں سلگتی ٹیسیں

آبلے کھل کے جو ہنستے ہیں خذف زاروں میں

کوئی شعلوں کی لپک تھی نہ دھوئیں کی لپٹیں

جل بجھی آب و ہوا کرب کے انگاروں میں

آنکھ تو آنکھ تھی سانسوں سے شعاعیں پھوٹیں

کوئی لپٹا تھا گھنی زلف کی مہکاروں میں

وہ جو عفت ہے سراپا تو مرا عجز بخیر

پوج لوں گا اسے پازیب کی جھنکاروں میں

ڈوب کر سو گئے اس بحر خلا میں راہیؔ

کوئی تنکا ہی نہ تھا کھوکھلے معیاروں میں