lazzat-e-ulfat se dil masrur hona chahiye

lazzat-e-ulfat se dil masrūr honā chāhiye

jo bhī hai shikva-gila sab duur honā chāhiye

dekh kar hāl-e-pareshāñ log sau bāteñ kareñ

pyaar meñ itnā nahīñ majbūr honā chāhiye

husn ab had se ziyāda naaz dikhlāne lagā

ishq tujh ko bhī zarā maġhrūr honā chāhiye

la.al-o-gauhar ke evaz patthar bhī bik jaa.e yahāñ

bechne vaalā faqat mash.hūr honā chāhiye

dekhte hī log ham ko banda-e-momin kaheñ

is qadar chehre pe apne nuur honā chāhiye

aaj bhī ādhe-adhūre ham se 'tashna' log haiñ

aap kā kuchh to karam bharpūr honā chāhiye

lazzat-e-ulfat se dil masrur hona chahiye

jo bhi hai shikwa-gila sab dur hona chahiye

dekh kar haal-e-pareshan log sau baaten karen

pyar mein itna nahin majbur hona chahiye

husn ab had se ziyaada naz dikhlane laga

ishq tujh ko bhi zara maghrur hona chahiye

lal-o-gauhar ke ewaz patthar bhi bik jae yahan

bechne wala faqat mashhur hona chahiye

dekhte hi log hum ko banda-e-momin kahen

is qadar chehre pe apne nur hona chahiye

aaj bhi aadhe-adhure hum se 'tashna' log hain

aap ka kuchh to karam bharpur hona chahiye