lazzat-e-ulfat se koi aashna hota nahin

lazzat-e-ulfat se koī āshnā hotā nahīñ

do diloñ ke biich jab tak fāsla hotā nahīñ

mujh ko is darja navāzā hai kisī ke ishq ne

munqata.a ab ranj-o-ġham kā silsila hotā nahīñ

bevafā.ī se tirī maiñ ḳhuub vāqif huuñ magar

apne dil ko kyā karūñ mujh se gila hotā nahīñ

bas tabhī tak terī ḳhush-fahmī kā baaqī hai bharam

aa.ine se terā jab tak sāmnā hotā nahīñ

ḳhvāhisheñ kar detī haiñ maa.il burā.ī kī taraf

varna koī aadmī az-ḳhud burā hotā nahīñ

baat to jab hai pas-e-tauba rahe sābit qadam

sirf tauba kar ke koī pārsā hotā nahīñ

pūjtā hai har koī chaḌhtā huā sūraj 'nasīr'

Dūbtā sūraj kisī kā bhī ḳhudā hotā nahīñ

lazzat-e-ulfat se koi aashna hota nahin

do dilon ke bich jab tak fasla hota nahin

mujh ko is darja nawaza hai kisi ke ishq ne

munqata ab ranj-o-gham ka silsila hota nahin

bewafai se teri main KHub waqif hun magar

apne dil ko kya karun mujh se gila hota nahin

bas tabhi tak teri KHush-fahmi ka baqi hai bharam

aaine se tera jab tak samna hota nahin

KHwahishen kar deti hain mail burai ki taraf

warna koi aadmi az-KHud bura hota nahin

baat to jab hai pas-e-tauba rahe sabit qadam

sirf tauba kar ke koi parsa hota nahin

pujta hai har koi chaDhta hua suraj 'nasir'

Dubta suraj kisi ka bhi KHuda hota nahin