لذت شناس درد کوئی آدمی نہ ہو

لذت شناس درد کوئی آدمی نہ ہو

میری طرح شکار غم دوستی نہ ہو

بھولے سے بھی کہا ہو اگر بے وفا تمہیں

مجھ کو تمام عمر میسر خوشی نہ ہو

وہ مجھ کو غیر سمجھیں برا یا بھلا کہیں

لیکن مرے خلوص میں یارب کمی نہ ہو

ساقی ہمارے واسطے وہ مے حرام ہے

جس میں تری نگاہ کی مستی ملی نہ ہو

آتا نہیں ہے رنگ محبت شباب پر

محبوب کی طرف سے اگر برہمی نہ ہو

افگنؔ غم حیات پہ کچھ تبصرہ نہ کر

جب تک حدیث غم سے تجھے آگہی نہ ہو

سنتا ہوں شور جب بھی کہیں سوچتا ہوں میں

میرے حضور کی یہیں محفل جمی نہ ہو