lazzat-shanas-e-dard koi aadmi na ho

lazzat-shanās-e-dard koī aadmī na ho

merī tarah shikār-e-ġham-e-dostī na ho

bhūle se bhī kahā ho agar bevafā tumheñ

mujh ko tamām 'umr mayassar ḳhushī na ho

vo mujh ko ġhair samjheñ burā yā bhulā kaheñ

lekin mire ḳhulūs meñ yārab kamī na ho

saaqī hamāre vāste vo mai harām hai

jis meñ tirī nigāh kī mastī milī na ho

aatā nahīñ hai rang-e-mohabbat shabāb par

mahbūb kī taraf se agar barhamī na ho

'afgan' ġham-e-hayāt pe kuchh tabsira na kar

jab tak hadīs-e-ġham se tujhe āgahī na ho

suntā huuñ shor jab bhī kahīñ sochtā huuñ maiñ

mere huzūr kī yahīñ mahfil jamī na ho

lazzat-shanas-e-dard koi aadmi na ho

meri tarah shikar-e-gham-e-dosti na ho

bhule se bhi kaha ho agar bewafa tumhein

mujh ko tamam 'umr mayassar KHushi na ho

wo mujh ko ghair samjhen bura ya bhula kahen

lekin mere KHulus mein yarab kami na ho

saqi hamare waste wo mai haram hai

jis mein teri nigah ki masti mili na ho

aata nahin hai rang-e-mohabbat shabab par

mahbub ki taraf se agar barhami na ho

'afgan' gham-e-hayat pe kuchh tabsira na kar

jab tak hadis-e-gham se tujhe aagahi na ho

sunta hun shor jab bhi kahin sochta hun main

mere huzur ki yahin mahfil jami na ho