لے گیا مجھ سے مجھے روٹھ کے جانے والا

لے گیا مجھ سے مجھے روٹھ کے جانے والا

کاش یہ حادثہ بھی ہوتا بھلانے والا

پھول جب روز کتابوں میں کھلا کرتے تھے

وہ زمانہ نہیں اب لوٹ کے آنے والا

اب دعاؤں سے مقدر نہیں بدلا کرتے

آپ بھی کام کریں کوئی زمانے والا

مدتوں پاس سمندر کے رہا میں لیکن

ایک قطرہ نہ ملا پیاس بجھانے والا

اب فسادوں کی خبر سن کے لرز جاتا ہوں

گھر میں بس ایک ہی بیٹا تھا کمانے والا

شہر آنکھوں کا بہت دن سے ہے سونا آذرؔ

حادثہ کوئی تو ہو دل کو دکھانے والا