le kar koi paigham kabutar nahin aate

le kar koī paiġhām kabūtar nahīñ aate

ab ġham bhī tirā ruup badal kar nahīñ aate

kuchh boriyāñ aisī haiñ jo beroñ se ladī haiñ

par un pe kisī or se patthar nahīñ aate

har sub.h to khilte nahīñ nargis ke hasīñ phuul

har roz to gulshan meñ payambar nahīñ aate

har shaḳhs liye phirtā hai hāthoñ meñ saroñ ko

hāthoñ meñ nazar ab kahīñ ḳhanjar nahīñ aate

bīmār kahīñ ho na paḌosī chalo dekheñ

ab raat meñ us samt se patthar nahīñ aate

qad apnā baḌhā lete haiñ baisākhī lagā kar

jo log mire sar ke barābar nahīñ aate

uTh jaate haiñ be-sāḳhta paañv tirī jānib

ham dar pe tire soch-samajh kar nahīñ aate

darvāza bhulā detā haiñ ik din unheñ 'ishrat'

jo log ki rātoñ meñ bhī ghar par nahīñ aate

le kar koi paigham kabutar nahin aate

ab gham bhi tera rup badal kar nahin aate

kuchh boriyan aisi hain jo beron se ladi hain

par un pe kisi or se patthar nahin aate

har subh to khilte nahin nargis ke hasin phul

har roz to gulshan mein payambar nahin aate

har shaKHs liye phirta hai hathon mein saron ko

hathon mein nazar ab kahin KHanjar nahin aate

bimar kahin ho na paDosi chalo dekhen

ab raat mein us samt se patthar nahin aate

qad apna baDha lete hain baisakhi laga kar

jo log mere sar ke barabar nahin aate

uTh jate hain be-saKHta panw teri jaanib

hum dar pe tere soch-samajh kar nahin aate

darwaza bhula deta hain ek din unhen 'ishrat'

jo log ki raaton mein bhi ghar par nahin aate