le ke parcham mere daman ka khaDe hain sare

le ke parcham mire dāman kā khaḌe haiñ saare

aa ke phir jism pe patthar ye paḌe haiñ saare

dafn karne kī hai insāñ ko zarūrat ab kyā

sharm se ḳhud meñ hī ḳhud se to gaḌe haiñ saare

ziist kī raah ko ab apnī banānā tū misāl

haiñ pashemān jo manzil pe khaḌe haiñ saare

kitnī parvāz bharo apnā na āġhāz tajo

par bikhar ke to zamīñ par hī paḌe haiñ saare

badlā hai saarā jahāñ badlī na qaum-e-āshiq

in ko samjhā.iye kyā chikne ghaḌe haiñ saare

umr to saarī gañvā.ī ho na paa.e insāñ

par ḳhudā banñe ko phir bhī to aḌe haiñ saare

ḳhud ko kar ḳhatm hī karte haiñ vo āġhāz nayā

patte vo zard jo shāḳhoñ se jhaḌe haiñ saare

le ke parcham mere daman ka khaDe hain sare

aa ke phir jism pe patthar ye paDe hain sare

dafn karne ki hai insan ko zarurat ab kya

sharm se KHud mein hi KHud se to gaDe hain sare

zist ki rah ko ab apni banana tu misal

hain pasheman jo manzil pe khaDe hain sare

kitni parwaz bharo apna na aaghaz tajo

par bikhar ke to zamin par hi paDe hain sare

badla hai sara jahan badli na qaum-e-ashiq

in ko samjhaiye kya chikne ghaDe hain sare

umr to sari ganwai ho na pae insan

par KHuda banne ko phir bhi to aDe hain sare

KHud ko kar KHatm hi karte hain wo aaghaz naya

patte wo zard jo shaKHon se jhaDe hain sare