le ke yaadon ke chaman-zar kahan se aai

le ke yādoñ ke chaman-zār kahāñ se aa.ī

ye sabā-e-karam-āsār kahāñ se aa.ī

dhuup hī dhuup meñ zehnoñ ko safar karnā hai

dasht-e-ehsās meñ dīvār kahāñ se aa.ī

maiñ ne manzar hī nahīñ dekhe haiñ pas-manzar bhī

mujh meñ ab jur.at-e-dīdār kahāñ se aa.ī

dekhiye ahd-e-guzashta ke mohabbat vaale

sochiye azmat-e-kirdār kahāñ se aa.ī

chhū ke aa.ī hai sabā aaj zarūr un ke qadam

varna ye shoḳhī-e-raftār kahāñ se aa.ī

kyā koī dil kā ḳharīdār idhar aa niklā

is qadar garmī-e-bāzār kahāñ se aa.ī

mere hoñToñ pe to ik giit thā fariyād na thī

phir ye zanjīr kī jhankār kahāñ se aa.ī

itnī nudrat tire ash.ār meñ pahle to na thī

'shān' ye zīnat-e-afkār kahāñ se aa.ī

le ke yaadon ke chaman-zar kahan se aai

ye saba-e-karam-asar kahan se aai

dhup hi dhup mein zehnon ko safar karna hai

dasht-e-ehsas mein diwar kahan se aai

main ne manzar hi nahin dekhe hain pas-manzar bhi

mujh mein ab jurat-e-didar kahan se aai

dekhiye ahd-e-guzashta ke mohabbat wale

sochiye azmat-e-kirdar kahan se aai

chhu ke aai hai saba aaj zarur un ke qadam

warna ye shoKHi-e-raftar kahan se aai

kya koi dil ka KHaridar idhar aa nikla

is qadar garmi-e-bazar kahan se aai

mere honTon pe to ek git tha fariyaad na thi

phir ye zanjir ki jhankar kahan se aai

itni nudrat tere ashaar mein pahle to na thi

'shan' ye zinat-e-afkar kahan se aai