le liya wada un ke aane ka

le liyā va.ada un ke aane kā

ab muqaddar ġharīb-ḳhāne kā

khul gayā raaz muskurāne kā

tum ko nukta milā bahāne kā

roz hī inqalāb aate haiñ

kyā bharosa kisī zamāne kā

ek sayyād ek maiñ ik barq

sab ko armāñ hai āshiyāne kā

dil meñ bhī kuchh hai ai jabīn-e-niyāz

tū to hai naqsh āstāne kā

tum to hone lage ho sanjīda

ab maiñ aañsū nahīñ bahāne kā

jāneñ anjām barq yā sayyād

hai to āġhāz āshiyāne kā

qismat-e-ishq yā ho daulat-e-husn

kis ko shikva nahīñ zamāne kā

ashk-e-rangīñ mirā fasāna hai

zindagī naam hai fasāne kā

yaas hai ik harā-bharā buuTā

mere dil ke nigār-ḳhāne kā

ḳhauf-e-sayyād se laraztā huuñ

dil huuñ maiñ apne āshiyāne kā

zindagī hārne lagī himmat

ab rahā kyā hai āzmāne kā

gul kī ḳhātir chaman meñ baste haiñ

aur bahāna hai āshiyāne kā

mahfil-e-ġhair meñ zarā bach kar

maiñ kahīñ tum ko yaad aane kā

saath tauba lagī huī thī 'zakī'

aur khulā dar sharāb-ḳhāne kā

le liya wada un ke aane ka

ab muqaddar gharib-KHane ka

khul gaya raaz muskurane ka

tum ko nukta mila bahane ka

roz hi inqalab aate hain

kya bharosa kisi zamane ka

ek sayyaad ek main ek barq

sab ko arman hai aashiyane ka

dil mein bhi kuchh hai ai jabin-e-niyaz

tu to hai naqsh aastane ka

tum to hone lage ho sanjida

ab main aansu nahin bahane ka

jaanen anjam barq ya sayyaad

hai to aaghaz aashiyane ka

qismat-e-ishq ya ho daulat-e-husn

kis ko shikwa nahin zamane ka

ashk-e-rangin mera fasana hai

zindagi nam hai fasane ka

yas hai ek hara-bhara buTa

mere dil ke nigar-KHane ka

KHauf-e-sayyaad se larazta hun

dil hun main apne aashiyane ka

zindagi haarne lagi himmat

ab raha kya hai aazmane ka

gul ki KHatir chaman mein baste hain

aur bahana hai aashiyane ka

mahfil-e-ghair mein zara bach kar

main kahin tum ko yaad aane ka

sath tauba lagi hui thi 'zaki'

aur khula dar sharab-KHane ka