le uDe KHak bhi sahra ke parastar meri

le uḌe ḳhaak bhī sahrā ke parastār mirī

raah takte hī rahe shahr ke bāzār mirī

tez āñdhī ne kiye mujh pe balā ke hamle

phir bhī qaa.em rahī miTTī kī ye dīvār mirī

chhup gayā thā mire jañgal meñ koī saaya sā

aaj tak us ke ta.āqub meñ hai talvār mirī

guuñj ubhregī mirī ruuh ke sannāToñ se

salb ho jā.egī jab tāqat-e-guftār mirī

TūTtī jaatī haiñ sāñsoñ kī shikasta kaḌiyāñ

phailtī jaatī hai sahrāoñ meñ jhankār mirī

kitnā be-kaif tamāshā-e-bahārāñ niklā

jab ḳhizāñ ban ke bujhī ḳhvāhish-e-iz.hār mirī

ham-safar chāñd na sūraj na sitāre nikle

tez hai gardish-e-daurāñ se bhī raftār mirī

ātish-o-āb-o-havā ḳhāk-o-ḳhalā-o-aflāk

kitne qiloñ pe ba-yak-vaqt hai yalġhār mirī

ġham zamāne meñ koī jins to 'siddīq' nahīñ

kyā ḳharīdeñge koī chiiz ḳharīdār mirī

le uDe KHak bhi sahra ke parastar meri

rah takte hi rahe shahr ke bazar meri

tez aandhi ne kiye mujh pe bala ke hamle

phir bhi qaem rahi miTTi ki ye diwar meri

chhup gaya tha mere jangal mein koi saya sa

aaj tak us ke taaqub mein hai talwar meri

gunj ubhregi meri ruh ke sannaTon se

salb ho jaegi jab taqat-e-guftar meri

TuTti jati hain sanson ki shikasta kaDiyan

phailti jati hai sahraon mein jhankar meri

kitna be-kaif tamasha-e-bahaaran nikla

jab KHizan ban ke bujhi KHwahish-e-izhaar meri

ham-safar chand na suraj na sitare nikle

tez hai gardish-e-dauran se bhi raftar meri

aatish-o-ab-o-hawa KHak-o-KHala-o-aflak

kitne qilon pe ba-yak-waqt hai yalghaar meri

gham zamane mein koi jins to 'siddiq' nahin

kya KHaridenge koi chiz KHaridar meri