lekhe ki yan bahi na zar-o-mal ki kitab

lekhe kī yaañ bahī na zar-o-māl kī kitāb

hai apne haq meñ vā-shud-e-dil faal kī kitāb

bulbul kā zer-e-bāl na bejā samajh tū hai

us ke mutāle.e meñ par-o-bāl kī kitāb

mazkūr zulf hai mire dīvāñ meñ sar-ba-sar

har saf.ha us kā kyuuñ na bane jaal kī kitāb

fursat milī to ḳhāma-e-bāl-e-tadarv se

'āshiq tire likheñge tirī chaal kī kitāb

juz yasfikuddimā' kī aaya na vo paḌhe

qur.āñ ho garche us but-e-qattāl kī kitāb

shakl-e-urūs chhaT na ḳhush aave mujhe kabhī

rakh deñ jo mere sāmne ashkāl kī kitāb

dekhe jo ġhaur se koī dīvāñ mire to haañ

har bait hai zamāne ke ahvāl kī kitāb

sharm-e-gunah se aab huā garche maiñ vale

dhoī ga.ī na nāma-e-ā'māl kī kitāb

paayā na sa.ad-o-nahs se koī varaq tahī

tāroñ kī maiñ ne ḳhuub jo ġhirbāl kī kitāb

kis tarah roz-e-hashr vo hoveñge surḳh-rū

dekhā kiye haiñ yaañ jo ḳhat-o-ḳhāl kī kitāb

is dahr meñ bulandī-e-az.hān-e-kund se

maiñ garche jāntā thā inheñ faal kī kitāb

har jild 'mus.hafī' tire dīvān kī vale

nuqtoñ se shak ke ban ga.ī rummāl kī kitāb

lekhe ki yan bahi na zar-o-mal ki kitab

hai apne haq mein wa-shud-e-dil fal ki kitab

bulbul ka zer-e-baal na beja samajh tu hai

us ke mutalee mein par-o-baal ki kitab

mazkur zulf hai mere diwan mein sar-ba-sar

har safha us ka kyun na bane jal ki kitab

fursat mili to KHama-e-baal-e-tadarw se

'ashiq tere likhenge teri chaal ki kitab

juz yasfikuddima' ki aaya na wo paDhe

quran ho garche us but-e-qattal ki kitab

shakl-e-urus chhaT na KHush aawe mujhe kabhi

rakh den jo mere samne ashkal ki kitab

dekhe jo ghaur se koi diwan mere to han

har bait hai zamane ke ahwal ki kitab

sharm-e-gunah se aab hua garche main wale

dhoi gai na nama-e-a'mal ki kitab

paya na sad-o-nahs se koi waraq tahi

taron ki main ne KHub jo ghirbaal ki kitab

kis tarah roz-e-hashr wo howenge surKH-ru

dekha kiye hain yan jo KHat-o-KHal ki kitab

is dahr mein bulandi-e-azhan-e-kund se

main garche jaanta tha inhen fal ki kitab

har jild 'mushafi' tere diwan ki wale

nuqton se shak ke ban gai rummal ki kitab